अनावश्यक स्थलांतर टाळा अनेक वर्षांपासून गरज नसताना तालुक्यातून जिल्ह्याला, जिल्ह्यातून प्रमुख महानगरांना वैद्यकीय कारणांसाठी स्थलांतर सुरु आहे. यातले काही गरजेचे असले तरी बरचसे स्थानमहात्म्यामुळे असते. प्रत्येक गावात एक असा सधन वर्ग असतो जो आकर्षण व स्टेट्स सिम्बॉल म्हणून इतर शहरात जाऊन उपचार घेतो. यामुळे मग इतर ही परवडत नसलेले ही याची नक्कल करतात. पण अनावश्यक प्रवास म्हणजे कोरोनाची जोखीम. म्हणून आपला गावात जर त्याच डिग्रीचे डॉक्टर उपलब्ध असतील तर आधी तिथेच उपचार घेणे सध्या तरी साथीचा जोर असे पर्यंत हितावह असेल. बऱ्याचदा तालुक्याच्या ठिकाणी उपलब्ध असलेल्या सुविधा अनेकांना माहित ही नसतात. म्हणून आपल्या गावात कुठल्या डिग्रीचे किती डॉक्टर आहेत. कुठले तज्ञ आहेत व कुठल्या डिग्रीचे डॉक्टर कशावर उपचार करतात हे मुलभूत ज्ञान व माहिती मिळवावी. अगदी लसीकरणासारख्या गोष्टी ज्या बालरोगतज्ञाला फक्त टोचून द्यायच्या असतात त्यासाठीही पालक तालुक्याहून जिल्ह्याला जाणारे अनेक पालक असतात. पण याने जिल्ह्याची गर्दी तर वाढतेच शिवाय तुम्ही अनावश्यक गर्दीच्या ठिकाणी जाता. म्हणून आपल्या भागातील वैद्यकीय सेवेचा माहिती घेऊन लाभ घ्यावा.
डॉ. अमोल अन्नदाते यांचे लेख वाचा
अनावश्यक स्थलांतर टाळा वैद्यकीय कारणासाठी स्थलांतराचे अजून एक मोठे कारण म्हणजे पहिले बाळ किंवा त्यानंतरचे ही काही बाळंतपण माहेरी झाला पाहिजे हा अट्टहास. यात बाळंतपणाचा खर्च माहेरच्यांवर ढकलणे हे ग्रामीण भागातील एक मोठे कारण असले तरी रिती रिवाज हे ही एक कारण आहे. या अट्टहासा पाई सधन कुटुंबाने डॉक्टर नसलेल्या खेड्यातील माहेरी पाठवून गुंतागुंत ओढवून घेतलेली ही कित्येक उदाहरणे माझ्या बघण्यात आहेत. लॉकडाऊनच्या काळात माहेरी बाळंतपणाच्या अट्टहासामुळे हॉट स्पॉट मधून ग्रीन झोन मध्ये प्रवास केलेले ही अनेक आहेत. आता मात्र बाळंतपण माहेरी हा नियम सोडून जिथे आहे तिथे , शक्यतो सासरीच आणि जिथे एमबीबीएस स्त्रीरोगतज्ञ आणि बालरोगतज्ञ आहे, गरज पडल्यास सिझेरियन करण्याची व भूलतजज्ञाची उपलब्धता आहे हे तत्व पाळून बाळंतपणा साठी स्थलांतर टाळणे कोरोना रोखण्यासाठी खूप आवश्यक आहे. सिटी स्कॅन, एम आर आय , डायलिसीस सारख्या सुविधा आपल्या भागात उपलब्ध असतील तर त्या ही तिथेच घ्याव्या.
सदरील माहिती आपण लोकमत मध्येही वाचू शकता